DUMINICA DI PASQUA
di Giacomo Guglielmelli
‘Na campana mo si senta:
stamatina sona a festa.
E continua e nun s’abbenta:
tutta ‘a gente mo si desta.
Di li fimmini ‘a notizia
ca Gesù è risuscitatu
e si spanna ssa notizia
in città e aru vicinatu.
Sunnu tutti stralunati
e nun sannu a chini crida.
Sunnu tutti arribbeddrati:
“Rivisciutu! Jati a vida!”
Due amici du Signuri
vannu là a si sincerare:
da notizia ‘un su sicuri,
loro s’hannu d’accertare.
Ma nun trovanu cchiù nente,
tuttu para nu misteru.
Pue però li vena a mente:
l’avia dittu ed era veru!
Archivi tag: Giacomo Guglielmelli
SIMU TANTI – di Giacomo Guglielmelli
SIMU TANTI
Giacomo Guglielmelli
Simu tanti ‘ntra ssu gruppu,
quannu lieju mi ci ‘nzuppu:
rime, canti, storie vere
di luntane primavere.
Ma nunn’è sulu ‘u passatu
ca ognunu c’ha postatu:
è ‘u guardare sempre avanti
ca da lingua simu amanti!
Vennari Santu – di Giacomo Guglielmelli
VENNARU SANTU
di Giacomo Guglielemelli E’ arrivatu ‘u ‘mburrazzune,
chiova forte e tira vientu!
Signu cumu ‘nu muzzune,
assai triste mo’ mi sientu!
Ca ssu juarnu mora Cristu
supra ‘a cruce crucifissu:
chini ‘un crida null’ha vistu
quantu funnu è chir’abissu
addui l’uaminu è cadutu
ppe superbia ed arroganza
e ‘nu Figliu c’è vulutu
ppe ‘un fa mora la speranza
ca si po’ cangiare vita,
ca si po’ turnare umani,
ripigliari la salita
ppe guardari allu dumani.